ਇੱਛਾ ਮੌਤ, ਸਾਡੇ ਸਮਾਜ ਸੇਵਕ ਤੇ ਅਖੌਤੀ ਆਜ਼ਾਦੀ

ਭਾਰਤ ਵਿਚ 'ਆਜ਼ਾਦੀ' ਭਾਵੇਂ ਆ ਗਈ ਪਰ ਜਿਨ੍ਹਾਂ ਲੋਕਾਂ ਕੋਲ ਪੈਸੇ ਜ਼ਿਆਦਾ ਨਹੀਂ ਤੇ ਨਾ ਵੱਡਾ ਕਾਰੋਬਾਰ ਬਣ ਸਕਿਆ, ਉਨ੍ਹਾਂ ਲੋਕਾਂ ਦੀ ਜ਼ਿੰਦਗੀ ਵਿਚ ਕੋਈ ਐਸ਼ ਬਹਾਰ ਨਹੀਂ ਆ ਸਕੀ! ਐਸ਼ ਬਹਾਰ ਤਾਂ ਚੱਲੋ ਦੂਰ ਸਗੋਂ ਬੀਮਾਰ ਹੋਣ ਉੱਤੇ ਉਨ੍ਹਾਂ ਲਈ ਇਲਾਜ ਕਰਾਉਣਾ ਵੀ ਔਖਾ ਹੈ। ਦੁਨੀਆਂ ਭਰ ਵਿਚ ਸਮੇਂ ਸਮੇਂ ਉੱਤੇ ਥੁੜ੍ਹੇ ਟੁੱਟੇ ਤੇ (ਮਰਨ ਲਈ) ਮਜਬੂਰ ਲੋਕ ਆਪਣੇ ਲਈ ਇੱਛਾ ਮੌਤ 'ਮੰਗਦੇ' ਰਹੇ ਹਨ। ਪਰ ਹੁਣ ਹੈਦਰਾਬਾਦ ਵਿਚ ਇਕ ਔਰਤ ਨੇ ਆਪਣੇ ਅਪਾਹਜ ਪੁੱਤਰ ਲਈ ਇੱਛਾ ਮੌਤ ਮੰਗੀ ਹੈ। ਇੱਛਾ ਮੌਤ ਮੰਗਣ ਦਾ ਵਰਤਾਰਾ ਹੀ ਸੂਹ ਦਿੰਦਾ ਹੈ ਕਿ ਜੀਣ ਵਾਲਾ ਜੀਣਾ ਨਹੀਂ ਚਾਹੁੰਦਾ ਪਰ ਐਤਕੀਂ ਮਾਮਲਾ ਥੋੜ੍ਹਾ ਨਵਾਂ ਹੈ। ਇਸ ਵਿਚ ਅਪਾਹਜ ਪੁੱਤਰ ਨੇ ਨਹੀਂ ਸਗੋਂ ਉਸ ਦੀ ਮਾਂ ਨੇ ਇੱਛਾ ਮੌਤ ਮੰਗੀ ਹੈ। ਅਸੀਂ ਸਮਝਦੇ ਹਾਂ ਕਿ ਅੱਜ ਜਦੋਂ ਅਖ਼ਬਾਰਾਂ ਭਰੀਆਂ ਪਈਆਂ ਹੁੰਦੀਆਂ ਹਨ ਕਿ ਫਲਾਣੇ ਦਾਨੀ ਨੇ ਫਲਾਣੀ ਸੰਸਥਾ ਨਾਲ ਰਲ੍ਹ ਕੇ ਆਹ ਕੀਤਾ, ਔਹ ਕੀਤਾ, ਤਾਂ ਅਜਿਹੇ ਪ੍ਰਚਾਰ ਭਰੇ ਦੌਰ ਵਿਚ ਜੇ ਕੋਈ ਵਿਅਕਤੀ ਅੰਨ੍ਹਾ ਪੈਸਾ ਕਮਾਉਣ ਦੇ ਬਾਵਜੂਦ ਕਿਸੇ ਮਜਬੂਰ ਦੇ ਕੰਮ ਨਹੀਂ ਆ ਸਕਦਾ ਤਾਂ Àਸ ਧਨਾਢ ਦੇ ਨਾਲ ਨਾਲ ਢੌਂਗੀ ਸਮਾਜ ਸੇਵਕਾਂ, ਪਖੰਡੀ ਦਾਨੀਨੁਮਾ ਡਾਕਟਰਾਂ ਦੇ ਕਿਰਦਾਰ ਉੱਤੇ ਵੀ ਸ਼ੱਕ ਹੁੰਦਾ ਹੈ। ਕੀ ਸਾਡੇ ਮੁਲਕ ਵਿਚ ਰੋਟਰੀਆਂ, ਜ਼ਿਮਖਾਨੇ ਤੇ ਦਾਨੀ ਨੁਮਾ ਨਿੱਜੀ ਹਸਪਤਾਲਾਂ ਵਾਲੇ ਨਹੀਂ ਹਨ, ਜਾਂ ਉਨ੍ਹਾਂ ਤਕ ਗਰੀਬਾਂ ਦੀ ਆਵਾਜ਼ ਨਹੀਂ ਪਹੁੰਚਦੀ। ਪੂਰਾ ਵਰਤਾਰਾ ਜਾਣਨ ਲਈ ਪੜ੍ਹੋ ਹੈਦਰਾਬਾਦ ਤੋਂ ਸਾਡੇ ਤੱਕ ਆਈ ਇਹ ਖ਼ਬਰ: 
''ਇੱਛਾ ਮੌਤ ਨੂੰ ਲੈ ਕੇ ਦੁਨੀਆਂ ਭਰ ਵਿਚ ਚੱਲ ਰਹੀ ਬਹਿਸ ਦਰਮਿਆਨ ਆਂਧਰ ਪ੍ਰਦੇਸ਼ ਵਿਚ ਗਰੀਬੀ ਨਾਲ ਜੂਝ ਰਹੀ ਇਕ ਬਜ਼ੁਰਗ ਔਰਤ ਨੇ ਆਪਣੇ ਅਪਾਹਜ ਪੁੱਤਰ ਲਈ  ਇੱਛਾ ਮੌਤ ਦੀ ਮੰਗ ਕੀਤੀ ਹੈ। ਉਹ ਕਹਿੰਦੀ ਹੈ ਕਿ ਹਰੇਕ ਮਹੀਨੇ ਮਿਲਣ ਵਾਲੀ ਸਿਰਫ ਪੰਜ ਸੌ ਰੁਪਏ ਮਹੀਨਾ ਦੀ ਪੈਨਸ਼ਨ ਵਿਚੋਂ ਉਹ ਆਪਣੇ ਪੁੱਤਰ ਦੇ ਇਲਾਜ ਦਾ ਖਰਚਾ ਨਹੀਂ ਚੁੱਕ ਸਕਦੀ। ਚਿੱਤੂਰ ਜ਼ਿਲ੍ਹੇ ਦੀ ਰਹਿਣ ਵਾਲੀ 64 ਸਾਲਾ ਲਕਸ਼ਮੀਅੱਮਾ ਨੇ ਸਥਾਨਕ ਅਦਾਲਤ ਵਿਚ ਆਪਣੇ 36 ਸਾਲਾ ਪੁੱਤਰ ਜਨਾਰਦਨ ਲਈ ਇੱਛਾ ਮੌਤ ਦੀ ਅਪੀਲ ਕੀਤੀ ਹੈ। ਜਨਾਰਦਨ ਪਿਛਲੇ 15 ਸਾਲਾਂ ਤੋਂ ਅਚੇਤ ਅਵਸਥਾ ਵਿਚ ਹੈ। ਉਸ ਦੇ ਹੱਥ ਪੈਰ ਲਕਵਾਗ੍ਰਸਤ ਹਨ ਤੇ ਉਹ ਬੋਲ ਨਹੀਂ ਸਕਦਾ। ਅਦਾਲਤ ਨੇ ਸੋਮਵਾਰ ਨੂੰ ਲਕਸ਼ਮੀਅੱਮਾ ਦੀ ਅਰਜ਼ੀ ਸਵੀਕਾਰ ਕਰ ਲਈ ਹੈ। ਮਾਮਲੇ ਦੀ ਅਗਲੀ ਸੁਣਵਾਈ ਤਿੰਨ ਮਾਰਚ ਨੂੰ ਹੋਵੇਗੀ। 
ਅਦਾਲਤ ਨੇ ਜ਼ਿਲ੍ਹਾ ਕਲੈਕਟਰ ਤੇ ਸਿਹਤ ਵਿਭਾਗ ਨੂੰ ਨੋਟਿਸ ਜਾਰੀ ਕਰਕੇ ਜਨਾਰਦਨ ਨੂੰ ਢੁਕਵੀਂ ਇਲਾਜ ਸਹੂਲਤ ਨਾ ਦੇਣ ਉੱਤੇ ਜਵਾਬ ਮੰਗਿਆ ਹੈ। ਹਾਲਾਂਕਿ ਵਧੀਕ ਜ਼ਿਲ੍ਹਾ ਮੈਜਿਸਟ੍ਰੇਟ ਸੁਮਨਲਤਾ ਇੱਛਾ ਮੌਤ ਦੇ ਖਿਲਾਫ ਹੈ। ਸੁਮਨਲਤਾ ਆਖਦੀ ਹੈ ਕਿ ਕਿਸੇ ਵਿਅਕਤੀ ਨੂੰ ਦੂਜੇ ਦੀ ਜ਼ਿੰਦਗੀ ਵਿਚ ਦਖ਼ਲ ਦੇਣ ਦਾ ਹੱਕ ਨਹੀਂ। ਏਅਰੋਨਾਟੀਕਲ ਸਾਇੰਸ ਵਿਚ ਗ੍ਰੈਜੁਏਟ ਜਨਾਰਦਨ ਦੀ ਗਿਣਤੀ ਕਦੇ ਹੁਸ਼ਿਆਰ ਵਿਦਿਆਰਥੀਆਂ ਵਿਚ ਹੁੰਦੀ ਸੀ। ਸਾਲ 1977 ਵਿਚ ਉਸ ਨੂੰ ਆਸਟ੍ਰੇਲੀਆ ਵਿਚ ਨੌਕਰੀ ਕਰਨ ਦੀ ਤਜਵੀਜ਼ ਆਈ ਸੀ। ਉਹ ਵੀਜ਼ਾ ਲੈਣ ਦੇ ਸਬੰਧ ਵਿਚ ਬੰਗਲੌਰ ਜਾਣ ਦੌਰਾਨ ਹਾਦਸਾ ਗ੍ਰਸਤ ਹੋ ਗਿਆ।  ਇੱਛਾ ਮੌਤ ਦਾ ਇਕ ਹੋਰ ਮਾਮਲਾ ਪਿਛਲੇ ਸਾਲ ਸੁਰਖੀਆਂ ਵਿਚ ਆਇਆ ਸੀ ਜਦੋਂ ਸੁਪਰੀਮ ਕੋਰਟ ਨੇ 37 ਸਾਲਾਂ ਤੋਂ ਮੁੰਬਈ ਵਿਚ ਕੋਮਾ ਵਿਚ ਪਈ ਅਰੁਣਾ ਸ਼ਾਨਬਾਗ ਨੂੰ  ਇੱਛਾ ਮੌਤ ਦੀ ਆਗਿਆ ਦੇਣ ਤੋਂ ਇਨਕਾਰ ਕਰ ਦਿਤਾ ਸੀ।''
ਹੁਣ ਸਾਡੀ ਸਮਝ ਇਹ ਕਹਿੰਦੀ ਹੈ ਕਿ ਜਿਹੜੇ ਲੋਕ ਵੀ ਨਾਂ ਖੱਟਣ ਲਈ ਸਮਾਜ ਸੇਵਾ ਦੇ ਰਾਹ ਪਏ ਹਨ, ਘੱਟੋ ਘੱਟ ਉਹ ਜਾਗਣ ਤੇ ਕਿਸੇ ਤਰ੍ਹਾਂ ਇਸ ਮੁੰਡੇ ਦਾ ਨਾਂ ਪਤਾ, ਪਤਾ ਕਰਾ ਕੇ ਮਦਦ ਲਈ ਤੁਰ ਪੈਣ। ਨਹੀਂ ਤਾਂ ਬੇਹੱਦ ਦੇਰ ਹੋ ਜਾਵੇਗੀ।
- ਯਾਦਵਿੰਦਰ 
9465329617